کریکبال وېبپاڼه- د ابوظبي په کوربتوب ټي ټين یا لس اوریزه لیګ سیالي چې نن ورځ رسما د ماراټه عربیانز او نرترن وريئرز لوبډلو په لوبې سره پیل شوې.
پکې لومړی لوبه کې د جاوید احمدي او یامین احمدزي په شتون کې ماراټه عربیانز لوبډلې په پنځو ویکټو بریا خپله کړه.
ماراټه عربیانز لوبډلې د پچې په ګټلو سره لومړی توپ وهنې وار نرترن وریئرز لوبډلې ته ورکړ.
وريئرز لوبډلې پخپلو لسو اورونو کې د دوو لوبغاړو په سوځیدو ۱۲۷ منډې وکړې.
د نرترن وریئرز لوبډلې له لوري برینډن کینګ (۲۹)،نیکولاس پورن (۱۹)،رومان پاول (۲۲) ناسوځیدلي منډې او همداشان لنډل سیمنز په ۳۱ توپونو د ۷ څلوریزو او یوې شپږیزې په مرسته (۵۴) ناسوځیدلي منډې وکړې.
د ماراټه عربیانز له لوري توپ اچونه کې مختار علي یوه ویکټ ترلاسه کړه.
یامین احمدزي دوه اورونه وکړل (۳۱) منډې یې ورکړې،خو په ویکټ اخیستلو بریالی نشو.
ټاکل شوی هدف د ماراټه عربیانز لوبډلې لخوا د لوبې په وروستي اور په وروستي توپ سره د پنځو لوبغاړو په سوځیدو ترلاسه او بریا یې خپله کړه.
د ماراټه له لوري توپ وهنه کې عبدالشکور بنګش تر ټولو ډیرې (۷۳) منډې جوړې کړې.
جاوید احمدي چې د ایرلینډ خلاف سیالیو کې هم نه وو ځلیدلی،دلته یې هم کومه کارکردګي ښکاره نه کړه او د یوې څلوريزې په مټ یې په ۳ توپونو (۶) منډې جوړې کړې.
د نرترن لوبډلې له لوري توپ اچونه کې فابیان الن (۲)،مهیش تکشنا او ریاض عمرت (۱-۱) ویکټ ترلاسه کړه.
ټاکل شوي څو شیبې وروسته به دوهمه سیالي د دېکن ګلډیئټرز او پوني لوبډلو ترمنځ ترسره شي.دېکن لوبډلې سره شهزاد هم شتون لري.
