کریکبال وېبپاڼه- د ابوظبي لیګ سیالیو په دوام تیره شپه د ډهلي بولز او د نرترن وريئرز لوبډلو ترمنځ په زړه پورې او جالبه لوبه ترسره شوه،چې پکې نرترن لوبډلې د واین پارنل د هېټریک په مرسته په ۳۲ منډو بریا خپله کړه.
نرترن لوبډلې د لومړی توپ وهنې په کولو سره په ټاکلو لس اورونو کې د ۳ لوبغاړو په سوځیدو ۱۳۷ منډې جوړې کړې او ډهلي بولز لوبډلې ته یې د ۱۳۸ منډو یو ستر هدف وټاکه.
دا په روان پړاو لس اوریزه لیګ سیالیو کې تر ټولو لوړ هدف وو چې یوه لوبډله یې مقابلې لوبډلې ته ږدي.
د نرترن وریئرز لوبډلې له لوري د لوبډلې مشر نیکولاس پورن ښکلي توپ وهنه یا بیټینګ ترسره کړ.
نوموړي په ۲۱ توپونو (۵۴) چټکې منډې ترلاسه کړې.د نوموړي په بیټینګ کې ۵ څلوریزې او ۵ شپږیزې شاملې وې.
همداشان په نورو توپ وهونکو کې ورته برینډن کینګ (۱۸)،پاول او الن په ترتیب سره (۲۴) او (۲۸) ناسوځیدلي منډې جوړې کړې.
د ډهلي بولز لوبډلې له لوري توپ اچونه کې وقاس مقصود،براوو او علي خان (۱-۱) ویکټ ترلاسه کړه.
محمد نبي هم یو اور ترسره کړ،خو وټکېد او ۲۴ منډې یې ورکړې،بې ویکټې پاتي شو.
ټاکل شوي هدف په مقابل کې ډهلي بولز لوبډلې د ۷ لوبغاړو په سوځیدو یوازې ۱۰۵ منډې جوړې کړې.
توپ وهنه کې رحمن الله ګربز په ۱۳ توپونو د یوې شپږیزې او یوې څلوریزې په وهلو سره ۱۵ منډې جوړې کړې او د عمرت لخوا بولډ اوټ شو.
محمد نبي په ۹ توپونو د یوې شپږیزې او یوې څلوریزې په وهلو سره (۱۵) ناسوځیدلي منډې جوړې کړې.
په نورو توپ وهونکو کې راوي بوفرا تر ټولو زیاتې منډې جوړونکی لوبغاړی وو.نوموړي په ۱۵ توپونو د ۴ شپږیزو او ۲ څلوریزو په مرسته (۳۶) منډې جوړې کړې.
د نرترن لوبډلې له لوري په توپ اچونه کې واین پارنل زبردست بالینګ یا توپ اچونه ترسره کړه.نوموړي د ډواین براوو،راترفورډ او علي خان په سوځولو هیټریک هم ترلاسه کړ او لومړی لوبغاړی شو چې په روان ټي ټین لیګ سیالیو کې هېټریک ترلاسه کوي.
نوموړي ۲ اورونو کې ۱۳ منډې ورکړې او ۳ ویکټې یې ترلاسه کړې.
په نورو توپ اچوونکو کې عمرت (۲)،لکشن او وهاب ریاض (۱-۱) ویکټ ترلاسه کړه.
ټاکل شوي چې نن به په یاد لیګ کې لومړی لوبه د پوني او ابوظبي لوبډلو ترمنځ ترسره شي.
دوهمه سیالي به نرترن وریئرز او بنګله ټایګرز لوبډلو ترمنځ او دریمه لوبه به دېکن ګلډیئټرز او قلندرز لوبډلو ترمنځ ترسره شي.
