نن شپه سریلانکا د انګلستان پر وړاندي
خبریال وېبپاڼه /نن شپه د سریلانکا او انګلستان تر منځ د شل اوریزو سیالیو لړۍ پیلیږي
ټاکل شوې ده چې د جون په ۲۳مه نېټه یانې نن شپه د افغانستان په وخت لس بجې د سریلانکا او انګلستان کرکټ لوبډلو تر منځ د دریو شل اوریزو سیالیو لړۍ پیل شي، چې دواړو لوبډلو دغو سیالیو ته پوره چمتووالی لري او سیالۍ به په خپل وخت تر سره شي.
د انګلستان په شپاړلس کسیزه لوبډله کې تر ډیره سینیر او تکړه لوبغاړو ته ځای ورکړل شوی، چې نن به د سریلانکا پر وړاندې ولوبیږي.
په دغه شپاړلس کسیزه لوبډله کې د لوبډلمشر ایون مورګن تر څنګ جوس بټلر، جیسن روی، ډیویټ میلن، جونی بیریسټو، معین علي، سام کرن،کریس ووکس، کرېس جورډن، عادل رشید، مارک ووډ، ډیویټ ویلې، لیام ډوسن، سیم بیلینګس، ټام کرن او لیام شتون لري.
د سریلانکا او انګلستان تر منځ د دریو شل اوریزو سیالیو لومړۍ لوبه نن شپه، دوهمه يې د جون په ۲۴مه او وروستۍ هغه يې بیا په ۲۵مه نېټه تر سره کیږي.
له دغو سیالیو وروسته به د دواړو لوبډلو تر منځ درې یورځینۍ سیالۍ هم تر سره شي، چې لومړۍ سیالۍ به يې د همدې میاشتې په ۲۹مه او دوهمه يې بیا د جولای میاشتې په لومړۍ او وروستۍ هغه يې بیا په ۴مه نېټه تر سره شي.
