نوین الحق د ویټالیټي بلاسټ سیالیو کې تر ټولو مخکښ توپ اچونکي دي
خبریال وېبپاڼه / نوین الحق د ویټالیټي بلاسټ سیالیو کې تر دې دمه ۱۵ لوبغاړي سوځولې.
انګلستان کورني شل اوریزه ویټالیټي سیالیو کې افغان تیز توپ اچونکي نوین الحق تر دې دمه ۱۵ لوبغاړي سوځولې دي.
نوین په اتو لوبو کې ۱۴ لوبغاړي سوځولې ول چې بېګا يې د خپلې لوبډلې لپاره په نهمه لوبه کې یوه بله ویکټ هم تر لاسه کړه، چې له دې سره د نوموړي په یادو سیالیو کې پنځلس ویکټې پوره شوې.
په بېګانۍ لوبه کې د نوین الحق اړوند لیسټر شآیر لوبډلې لومړی توپ وهنه وکړه د اوو لوبغاړو په سوځېدو يې په پوره شل اورونو کې ۱۵۶ منډې جوړې کړې او سیالې لوبډلې ته يې د ۱۵۷ منډو هدف په مخ کې کېښود.
په دوهم اننګز کې ورسیسټرشآیر لوبډلې ټاکل شوی هدف د لوبې په شلم اور کې د اوو لوبغاړو په زیان تر لاسه کړ او سیالې لوبډلې ته يې د درېو ویکټو په توپیر ماتې ورکړه.
افغان لوبغاړي نوین الحق په یاده لوبه کې په څلور اورونو د ۲۸ منډو په ورکولو سره د سیالې لوبډلې یوه ویکټ تر لاسه کړه، خو لوبډلې يې د درېو ویکټو په توپیر ماتې وخوړه.
یاده دې وي چې په یاد لیګ کې پنځه افغان لوبغاړي قیس احمد، محمد نبي، نوین الحق، مجیب الرحمان او راشد خان اخیستل شوي.
راشد چې د پاکستان په سوپر لیګ سیالیو کې بوخت ؤ نو له همدې امله یاد هېواد ته نه دی تللی، ویل کیږي چې راشد به ډیر ژر یاد هېواد ته لاړ شي او له خپلې لوبډلې سره به یو ځای شي، خو پاتې نور افغان لوبغاړي یاد هېواد ته تللي او له خپلو لوبډلو سره یوځای شوي.
