بابر اعظم: چي څه ډول مو فکر مو کاوه، هغسي ونه شول
خبریال وېبپاڼه / د پاکستان کرکټ ملي لوبډلې لوبډلمشر بابر اعظم د انګلستان د کرکټ ملي لوبډلي له خوا د سختې ماتې خوړلو وروسته په خپلو خبرو کې وویل، چې څه ډول فکر مو کاوه، هغسې لوبه مو ترسره نه کړه.
پرون په لومړۍ نړیواله یو ورځنۍ لوبه کې انګلستان د ۹ ویکټو په ستر توپیر پاکستان ته ماتې ورکړه او لوبه یې هم ډېر ژر ختمه کړه، د انګلستان لوبډله کې پنځه لوبغاړي په لومړي ځل لوبېدل او لوبډلمشري هم بین سټوکس کوله.
بابر اعظم رسنیو سره په خپلو خبرو کې وویل، چې په پیل کې انګلستان ډېره ښه توپ اچونه ترسره کړه او موږ ته یې د ملګرتیا جوړولو موقع په لاس رانکړه.
هغه زیاته کړه، د نویو لوبغاړو لوبېدو له امله بې پروا نه و، یو شمېر لوبغاړو د انګلستان لپاره مخکې هم لوبه کړې وه او موږ لیدلي و، ځینې لوبغاړي مو بیا په کاونټي کې لیدلي و او لوبه مو ورسره کړې وه.
بابر اعظم وویل، چې په راتلونکي لوبه کې به د ښې لوبه هڅه وکړو. موږ اوس هم انګلستان یوه غوره لوبډله ګڼو. هره ورځ یو ډول نه وي، هیله ده بله ورځ به تر نن غوره یو.
د یادولو وړ ده چي د دواړو لوبډلو ترمنځ دوهمه یورځیني یا پنځوس اوریزه لوبه سبا د جولای په لسمه د افغانستان پر وخت مازدیګر څلور نیمي بجي ترسره شي.
