د کرکټ نړيوالې شورا دري نورو هیوادونو ته دوهمه درجه غړیتوب ورکړه
خبریال وېبپاڼه / درې نورو هيوادونو ته د کرکټ نړيوالې شورا دوهمه درجه غړيتوب ورکړل شو.
د کرکټ نړيوالې شورا په ۷۸ کلنۍ غونډه کې چې نن په انلاين بڼه وشوه، درې نورو هيوادونو ته د يادې شورا دوهمه درجه غړيتوب ورکړل شو.
منګوليا، تاجکستان او سويزرلينډ هغه لوبډلې دي چې تازه د کرکټ نړيوالې شورا له لوري دوهمه درجه غړيتوب ورکولو سره د يادې شورا د غړو هيوادونو شمېر ۱۰۶ ته ورسيدو.
منګولیا دوهويشتم او تاجکستان درويشتم اسيايي هيواد او سویزرلینډ بيا د اروپا پنځه ديرشم هيواد شو چې د کرکټ نړيوالې شورا غړيتوب ترلاسه کوي.
دغه راز د يوې بلې پريکړې له مخې کرکټ نړيوالې شورا د زمبيا هيواد غړيتوب لغوه کړ او د روسيې غړيتوب يې وځنډوه.
کرکټ نړيواله شورا اوس مهال ۱۰۶ غړي هيوادونه لري چې ۹۶ يې دوهمه درجه او ۱۲ نور يې بشپړ غړيتوب لري.
