د افغانستان کرکټ بورډ څخه په خپره شوې خبرپاڼه کې راغلي، چې د ميدان وردګ ولايت په مرکز ميدان ښار کې به په ۲۲ جريبه ځمکه کې د کرکټ د یوه نوي لوبغالي جوړولو چارې یې پيل کړي.
خبرپاڼه کې راغلي ، چې د دغه لوبغالي د جوړولو چارې د تدارکاتي پروسې له بشپړولو وروسته د ايکسلنټ پاراګان په نوم د رغونې يو شرکت ته سپارل شوي، چې د يو نيم کال په موده کې به ګټې اخيستنې ته وسپارل شي.
خبرپاڼه زياتوي، چې د رغونې په لومړي پړاو کې د څلور زره نندارچيانو لپاره د ناستې ځای، د لوبغالي د هوارولو، د لوبغاړو د ناستې ځای«پويليون» او چمن جوړولو اسانتياوې شاملې دي.
د يادونې وړ ده، چې څو ورځې وړاندې د افغانستان کرکټ بورډ رئيس فرهان يوسفزي ويلي، چې د کرکټ له نړيوالې شورا څخه يې د ۲۰۲۴کال نړيوال جام غوښتنه کړې او په همدې موخه به په هېواد کې يو ستر پر نړيوالو معيارونو برابر لوبغالی هم ورغوي.
