کرکبال وېبپاڼه- د ډیلي فریش بند امیر ښامارانو لوبډلې پیاوړی الراونډر ابراهیم ځدراڼ چې څه موده وړاندې شپږیزه لیګ سیالیو ته د تیاري په موخه د تمرین پر مهال ټپي شوی و،اوس مهال یې ټپونه په رغیدو دي او نوموړی به شپږیزه لیګ سیالیو کې چمتو شي.
د ټپونو څخه د نوموړي د رغیدو خبر بند امیر لوبډلې پخپله فسبوک پاڼه ورکړی دی.
دوی زیاتې کړې چې ابراهیم ځدراڼ شپږیزه لیګ ته د تمریني کمپ پر مهال ټپي شوی و،خو په وخت سره د هغه درملنې له کبله اوس نوموړی د پخوا حالت څخه ښه شوی او مونږ هڅه کوو،چې شپږیزه لیګ سیالیو ته یئ چمتو کړو.
((د بند امير لوبډلې او مينه والو ته ښه خبر!
د ښامارانو لوبډلې تکړه ال راونډر ابراهيم ځدران چې شپږيزې ته د تمريناتي کمپ په لومړيو ورځو کې ټپي شوى وو اوس په چټکۍ سره په روغېدو دى.
د نوموړي درملنه مو په وخت سره وکړه او هم مو ورته د ډاکټر او روزونکې ډلې په سپارښتنو پوره ارام ورکړ چې اوس له پخوا ډېر ښه شوى.
هڅه کوو تر څو نوموړى زمونږ د لوبډلې د يوه مهم لوبغاړي په توګه د سږ کال شپږيزې ليګ مهمو او رسمي سياليو ته بشپړ چمتو شي.))
د یادونې وړ ده چې ابراهیم ځدراڼ د افغانستان کرکټ ملي لوبډلې لپاره دوه ټیسټ،درې شل اوریزې او یوه پنځوس اوریزه سیالي ترسره کړي ده،چې پکې (۱۶۸) منډې یې جوړې کړي دي.
نوموړي ته تیر کال د بنګله دېش خلاف په ټیسټ لوبه کې،په لومړي ځل افغان کرکټ ملي لوبډله کې ځای ورکړل شو او نوموړی وتوانید چې پخپله لومړی لوبه کې نیمه سلیزه جوړه کړي.
